Centro Turismo Marobo
Marobo fatin ida nebe konhesidu mos iha Timor Leste. Rai Marobo
partensia ba Distrito Bobonaro. Kapital
Distrito Bobonaro nian mak Maliana. Distrito Bobonaro kompostu sub distrito nen
(6) : Bobonaro, Maliana, Lolotoe, Kailaku, Balibo no Atabae.
Iha sub Distrito Bobonaro iha area turismo ida nebe popular
tebes Be Manas Marobo. Rai Marobo lokaliza iha parte leste distrito Bobonaro no parte norte
sub distrito Bobonaro. Klima iha Marobo kuando fulan Junho – Agosto sei sente
malirin liu iha Tempo kalan ho temperature bele tun to’o 15 Grau Celcius no rai
manas iha fulan Setembro temperature bele sente to’ 28 Grau Celcius.
Rai Marobo nia linha
fronteira mak parte Leste ho sub distrito Atsabe (Ermera), parte Oeste ho sub
distrito Maliana no Kailaku, parte Sul ho kapital sub distrito Bobonaro i parte
Norte ho sub distrito Kailaku no distrito Ermera. Rai Marobo kompostu Suku
Tolu (3) hanesan : Suku Atu-aben ( Aldeia Atian, Aldeia Male Robu no Aldeia
Talite), Suku Soileso (Aldeia Ai-Aras, Aldeia Soilesu Knua no Aldeia Purugua)
enkuantu Suku ida seluk mak Suku Ilat-Laun nebe okupa rai luan Marobo nian ho
nia aldeia lima (5) ; Aldeia Pue-Reman, Aldeia Klanbutsi, Aldeia Boroluli,
Aldeia Ulu-Lagar no Aldeia Atu-Egas. Lian
kemak mak nudar lian materna ba
populasaun Marobo tomak. Identidade Marobo nian nebe it abele hetan iha Suco
sira besik rai marobo maka Tais Marobo, Babadok, Kong, Tambor, Manu fulun,
Belak, Kaebauk, Ulu suku, no Surik. Kada tinan, iha fulan Maio sempre hala’o
festa kultura “HU KRAU DIKUR” nebe mak iha Lian Kemak konyesidu ho naran “ CUHI
MAROBO”. Serimonia ne’e nia objetivu atu hapara udan no tama ba tempo bai
loron. Iha festa kultura ida ne’e, iha aktividade kultura barak mak
realiza hanesan : Hu Krau Dikur, Tebe-tebe/Dahur (lian Kemak dehan “TEI
BALA”), Bidu ( URI ), Aldende iha mos serimonia tradisional Bolu Udan (Kemak:
Suma Ain), Kore Metan, Feto sa Uma Mane (UMA MANE MANE HEU), no Halo
Uma Adat ( HA UMA). 
Maioria povu Marobo
moris ho vida Agrikultor ho nia potensia sira hanesan Batar, Liis, Ai-manas, Modo, Nuu,
Kamii, Hudi, Talas, Fehuk, Ai Farina, Kumbili, Haas, Sabaraka, Kokonaba ka iha
lian kemak dehan Kumuduin. Alende
Potensia Agrikola iha mos potensia seluk iha rai laran nebe seidauk identifika
hotu hanesan Gas, Fatus no Osan Mean.
Mesmu iha fasilidade
Edukasaun iha area nee iha mos populasaun balun nebe sei analfabetu nunee ita
presiza mos introdus ita nia an kuandu sira la hatene tetun. Hai, mloin e sabe
nee dehan hai diak ka lae ; O galam sapana katak O nia naran sa ? ; ita hatan
hau nia naran (Galag aun …). Se hakarak husu hela fatin hateten O Bali po naba
katak o hela iha nebe ? ; hau hela iha … au bali po….; O atu ba nebe (O e daba
la ?); Hau atu ba Be manas (Au e da beabanas la)…se la hatene dalan ba be manas
it abele husu Favor ida hatudu bah au dalan atu ba be manas nian mak nebe ?
(Favor sea, cino da au, sala na e la da beabanas non ta naba). Sala na ela da
beabanas non ta nago ( dalan nee mak ba Be manas nian ); Be Manas loos ( Bea
nogo banasan).
Tuir Lia nain sira iha Suku Ilat Laun katak rai Marobo uluk
nudar rai LULIK, no tuir BEI ALA sira
haktuir katak Marobo sai hanesan husar ba rai Timor. Be manas pertense ba
Aldeia Atu-Egas, Bedois Boroluli pertense ba Aldeia Boroluli suku Ilat-laun.
Iha fatin be manas rua (2) iha Aldeia refere. Be manas daruak hanaran Be Manas
Dois ka Bedois Boroluli, tamba nia iis makas liu relasiona ho sulfur nebe makas
husi be manas nee. Temperatura be Manas entre 20-40o C.
Be Manas Marobo nee suli tun Mota Marobo nebe halai tuir mai ba
iha Mota Loes.
Share story!
0 comments
Posting Komentar